أيوى جااااااااااااااااااااااااااااى

يا جماعة انا مش عارف ازاى ابدا كلامى معاكم لكن صدقونى انا حاسس بشلل فى لسانى ومليش نفس لاى حاجة طبعا عارفين ليه غزة أيوة غزة نفسى الطريق يقصر واروح هناك وسط المعارك وسط الشعب المحاصر اللى لا عنده اكل ولا شرب ولا كهربا ولا....... حاجات كتيرة قوى مبقتش موجودة غابت عنهم هناك والحياة خلاص هتنعدم ده لو مكتش اتعدمت عند كتير منهم ..

اوعى حد ياخد كلامى ده اننا يائس حاش لله بالعكس ده انا عندى امل كبير فى نصر ربنا هو مش ربنا قال (ألا إن نصر الله قريب ) يبقى نخاف من ايه ان كانت امريكا اكبر دولة فالله اكبر وان كانت اسرائيل بتحاصر غزة فهتروح فين لما ربنا يحاصرها بجنوده ويكتب عليه الهلاك والموت ..

انا كنت بسمع خطيب الجامع بتاعنا لما كان بيتكلم عن شعب ابى طالب حصار وما بعده حصار مكنش يوم والا شهر والا حتى سنه ده كان 3 سنين الشيخ كان بيقول كانوا مش لاقيين اى حاجة على الاطلاق احكلكوا حاجة منها ..

شوفوا النبى صلى الله عليه وسلم لما ميلقيش حاجة يكلها غير ورق الشجر اللى كان بيمسحه بايده وياكله .. والصحابى اللى راح يقضى حاجتى وشاف حتة جلد مع انه قضى عليها حاجته لكنه اخدها ونضفها واقعد يمضغ فيها تلت ايام

اللى انا عايز اقول ان رغم الحصار ورغم الجوع ورغم العطش والله الفجر جاى ونفسى يجى على ادينا على كل حال انا بدات اغير من نفسى وعملت لنفسى برنامج ميه ميه ان شاء الله

1- هاقوم قبل الفجر بنص ساعة واصلى وادعى فى وقت السحر وفى كل صلاة

2- هاتبرع كل شهر بعشرة جنيه لفلسطين

3- مش هاجيب فى القهوة ولا فى البيت اى منتج من منتجات اسرائيل وامريكا الله يخرب بيوتهم

4- هاكلم كل اللى يقعد معايا او يجى عندى فى القهوة او اقابله فى الشارع عن فلسطين ودرونا

واقابلكم ان شاء الله لما اخلص الزباين

أيوى جااااااااااااااااااااااااااااااااااااااااااااااااااى